Egilea: editorea

Etikalia, Estatuko lehen higiezinen agentzia etikoa, REAS Euskadi ekonomia solidarioaren sareko kide egin da. Roberto Cacho Etikaliako zuzendariaren hitzetan, ekonomia solidarioaren sektorean urteak daramatzaten erakundeekin hitzarmenak lortzeko helburua du enpresak, eta baita entitate horien jardunbide egokiak gertutik ezagutu eta higiezinen sektorean aplikatzeko asmoa ere.

REAS ekonomia solidario eta alternatiboko sareen saretik pertsonen eta ingurunearen zerbitzura dagoen ekonomia sustatzen dute. Zentzu horretan, REASek proposamen kolektiboak indartu nahi ditu –giza garapen jasangarriaren ikuspegitik– gizartearen eta bereziki ekonomiaren eraldaketa lortzeko arlo guztietan: finantziazioa, ekoizpena, merkaturatzea eta kontsumoa. Halaber, kontsumo arduratsua, bidezkoa eta ekologikoa babesten du, eta finantziazio baliabide etiko eta solidarioen garapena bultzatu. Gainera, tokiko, Estatuko eta mundu mailako ekonomia solidarioko beste sare batzuekin koordinatzen da.

Higiezinen agentzia ezberdina

Etikaliak pasa den ekainean hasi zuen bere ibilbidea, etxebizitzen alokairurako bitartekari gisa berezituz. Alokatzeko momentuan sor daitezkeen arazo, behar eta beldurrei erantzuna ematen diete, bai jabeei eta bai errentariei, alderdi biei mesede egiteko. Modu horretan, errentatzaileek kontratuaren kuota kobra dezaten eta bandalismoak sor ditzakeen kalteak estalita izan ditzaten bermatzen dute. Horrez gain, Etikalia bidelagun dute etxebizitzen jabeek, alokairu-kontratuak irauten duen epean lasai egon daitezen ziurtatzeko. Errentariek, alokairura iristeko dituzten eragozpenak gutxituta ikusiko dituzte; besteak beste, banku-abalak eta higiezinaren kudeaketa ordaindu behar izatea aurreztuko dute.

Enpresaren funtzionamendua Guztion Onerako Ekonomian oinarritzen da eta, hortaz, bere jarduera ekonomikoa interes orokorrera eta onura publikora zuzenduta dago. Gerentearen esanetan, etxebizitzak alokatzen dituzten edota alokairuaren arriskuak saihesteagatik etxeak hutsik mantentzen dituzten pertsona gehienek higiezin hori urte askotako aurrezkiekin edota herentziaren batekin lortu dute. Hori dela eta, askotan, beren balio pertsonalak, elkartasuna edota eskuzabaltasuna kasu, etxebizitzen inguruko espekulazioaren kontrakoak dira. Orain, Etikaliak, gizarte-sentsibilitatea duten pertsona horiei, euren higiezina modu etikoan alokatzeko aukera ematen diete, beren balio pertsonalekin bat eginez.

Ondorengo hilabeteetan Etikaliak I+G eta hobekuntza proiektu batzuk martxan jarriko ditu. Horien helburua da etxebizitzen eskaintza handitzea; higiezina alokatu edo saldu nahi dutenei zerbitzu berritzaileak ematea; eta aholkularitza eta kudeaketa zerbitzuak eskaintzea enpresei eta korporazio handiei.

Iturria: REAS

 

GoiEner irabazi-asmorik gabeko kontsumo-kooperatibak energia elektriko berriztagarria komertzializatzen du 2012. urtetik, eta 2.700 bazkidetik gora ditu. Gipuzkoako kooperatiba hori arduratzen da etxe eta enpresak energia berriztagarriarekin hornitzeaz, Ipar Europako hainbat herrialdetan jada ezarrita dagoen sistema eredu gisa hartuz.

 

Goienerren motako beste kooperatibarik ez dago Euskadin, eta Espainiako beste leku batzuetan, Sorian edo Guadalajaran, antzeko ekimenak sustatzen ditu. Epe luzera “eredu aldaketa” lortu nahi dute, baina, horretarako, biztanleriaren laurdenak egon beharko luke inplikatuta.

 

Gipuzkoako Foru Aldundiak, Ingurumen eta Lurralde Antolamenduko departamenduaren bidez, eta GoiEner kooperatibak laguntza eskainiko diote elkarri arlo teknikoan eta kudeaketan, erakunde foralak aldarrikatzen duen energia iraunkorraren ereduari eusteko. Horrela, zerbitzuen eta programen hedapenean elkarlanean arituko dira, eta biek konpromiso ekonomikoa dakarten hitzarmenak sinatuko dituzte, programa bateratuak zehazteaz gain.

 

Akordioa otsailaren 9an aurkeztu zuten Diputazioko Jauregian eskainitako prentsaurrekoan. Bertan parte hartu zuten GoiEnerreko presidenteak, Juan Esteban Maizak, eta Ingurumen eta Lurralde Antolamenduko diputatuak, Iñaki Errazkinek. Azken horrek ildo bereko hitzarmenak egitea eskatu die beste euskal erakundeei; izan ere, “eredutzat” har daiteke energia iraunkorrerantz pausuak emateko.

 

Iturria: El Diario Vasco

 

Lantegi Batuak erakundeak desgaitasuna duten pertsonen aldeko ekintzak sustatuz eman dio hasiera 2015 urteari. Ekimen horien artean hiru nabarmentzen ditugu: blog berriaren aurkezpena, Ausolan kooperatibarekin sinatutako akordioa, eta, zahartze aktiboaren filosofiaren barne, desgaitasuna duten pertsona helduen bizi-kalitateari buruzko ikerketa.

Alde batetik, Lantegi Batuak entitateak urtarrilean estreinatu zuen blog berria, www.cienporciencapaces.com. Kanal berri hori online komunikazio proiektuaren lehen pausoa da. Bloga atal desberdinetan dago egituratuta: Gaurkotasuna, Zerbitzu eta Irtenbideak, Gizarteratzea, Gaitasunak eta Ekitaldiak. Modu horretan, Lantegi Batuak-ek eduki hobeak eta hobeto egituratuak eskaintzen ditu, bisitari bakoitzak gehien interesatzen zaiona aurki dezan: desgaitasuna duten pertsonekin egiten diren ekintzak, negozio ekimenak, enpresentzako zerbitzuak, kolaborazioak eta abar. Blogetik Lantegi Batuak-eko webgunera, Youtubeko kanalera eta sare sozialetan dituzten profiletara sar daiteke.

Bestetik, Lantegi Batuak-ek eta Ausolan-ek, talde handientzako sukaldaritza-zerbitzua eskaintzen duen kooperatibak, desgaitasuna duten pertsonen laneratzea bultzatzeko akordioa sinatu dute. Hitzarmen horri esker, Ausolanek Lantegi Batuak-eri 4.000 euroko diru-laguntza emango dio, eta azken horrek prestakuntza eta trebakuntza programetara zuzenduko du dirua.

Azkenik, Lantegi Batuak-ek desgaitasuna duten 40 urtetik gorako pertsonen zahartze sintomak berandutu nahi ditu, zahartze aktiboaren filosofiaren barne, beren bizi-kalitatea hobetzeko. Zentzu horretan, 2006. urtean, BBK Gizarte Ekintzaren laguntzarekin, pertsona helduaren gaitasun fisikoak eta lan-gaitasunak aztertzen dituen sistema garatu zuten, baita zahartze sintomak antzematen dituen protokoloa ere. Izan ere, zahartze prozesua aurreratu egiten da adimen urritasuna dutenen artean.

2014. urtearen bukaeran, Bizkaiko Foru Aldundiaren laguntzarekin, aipatutako adin tartean dauden pertsonak ikertzen hasi ziren, eta zahartze prozesua hasita dagoela erakusten duten sintomak nortzuk zituzten egiaztatu zuten. Horri aurre egiteko, lau metodologia probatu zituzten: Feldenkrais, Snoezelen, Biodantza eta Funtzio Anitzeko Teknologia.

Iturria: Lantegi Batuak eta GEEB

 

ANELek, Nafarroako Gizarte Ekonomiako Enpresen Elkarteak, emakume langabetuen ekintzailetza eta trebakuntza profesionala sustatzen duen esperientzia zabaldu nahi dute Italiara, Frantziara, Errumaniara eta Lituaniara, CAREMPLOY programaren bidez.

Egitasmo horrek, gizarte eta osasun arloetan prestakuntza emateaz gain, “norbere kontura hasteko aukera ematen die emakumeei, etxez etxeko arreta eskaintzen duen Nafarroako lehen kooperatibaren bidez”. MCuida du izena eta ANELen baitan dagoen Ekintzaileen Kooperatibaren barne dago. Etxez etxeko zerbitzua eskaintzeak erronka handia dakar, "gero eta prestakuntza, gizatasun eta kalitate handiagoa eskatzen baitute sektore honetan”.

Zentzu horretan, MCuidako bazkide den Beatriz Carrerok nabarmendu du 12 emakume “konprometitu eta tituludun” ari direla, dagoeneko, menpekotasun egoeran dauden pertsonei etxean bertan zerbitzuak eskaintzen, ANELen laguntzarekin. Guztiak PREPÁRATE izeneko laneratze eta prestakuntza programaren bidez jarri ziren abian. Gaur egun, “autoenplegu kolektiboa sustatuz” haratago iritsi nahi duen proiektu kooperatibo batekin ari dira zerbitzuak ematen.

Esperientzia hori ezagutzera hurbildu dira, hain zuzen, Europako lau herrialdeetako ordezkariak. Ekimenari esker, ANELen gizarte-ekonomiako ekintzailetza-programak nazioartera hedatzeko "pauso garrantzitsua" eman ahal izan dute, Ignacio Ugalde presidenteak aipatu duenez. Gainera, lau herrialde horiek ANELekin harremanetan jarri izanak “Europan eredu kooperatiboak interes handia" pizten duela erakusten du, Ugaldek nabarmendu duenez. Izan ere, lanpostuak sortzeko aukera moduan ikusten dute, baita lan-merkatuak adin, prestakuntza edo genero arrazoiengatik baztertzen dituen pertsonak lanerako gai direla ikusarazteko erreminta bezala ere.

Iturria: ANEL

 

Joan den otsailaren 6an, Madrilgo CIRIEC-Espainiako zuzendaritza-kontseiluak egin zuen bileran, Monzón irakasleak elkartearen presidentzia exekutiboa uzteko asmoa iragarri zuen, 28 urtez honen buru izan eta gero.

Erabaki horrek ez du eraginik izan CIRIEC-Espainia eta nazioarteko CIRIEC elkarteetan dituen beste arduretan; bereziki, zuzenduko duen batzorde zientifikoan.

Monzón irakaslea Valentziako Unibertsitateako Ekonomia Aplikatuko katedraduna da, gizarte-ekonomian mundu mailan aditua da eta Espainiako CIRIEC sekzioko buru izan da 28 urtez.

CIRIEC erakundea mundu osoko hamabost bat herrialdetan dago eta, bertan, kooperatibismoa, ekonomia publikoa eta gizarte-ekonomia gaien inguruko informazioan eta ikerkuntzan lan egiten dute. Duela ehun urte baino gehiago sortu zen.

Iturria: OVES

 

Eroski kooperatibak menu orekatuen planifikazioa errazten duen tresna interaktibo bati buruzko hitzaldiak eskaintzen ditu bere denda-sarean.

Saio horietara bertaratzen diren bazkideek Planner Menua ezagutzeko aukera izango dute. Asteko menua modu errazean planifikatzeko, Nestlék familiei laguntzeko sortu duen online tresna interaktiboa da hori. Aplikazioa www.nestlemenuplanner.es web orrian dago erabilgarri, eta nutrizio aldetik oreka bermatzen laguntzen du eguneroko eta asteroko elikagaien harremanetan eta mantenugai moten araberako kalorien banaketan.

Iturria: Diario Vasco

Urte eta erdiz bisitak, elkarrizketak, deiak eta kontu-ikuskaritzak egin eta gero, Gasteizko RPK kooperatiba taldeak ekoizpen ildo berria estreinatu du BMW 3,4 eta 5 serieetako motorren balbularako kontrol sistemako piezetako bat osorik fabrikatu ahal izateko. Izan ere, kooperatibak gaitasun handia du industriaren, medikuntzaren, elektrizitatearen eta bere indarrez dabiltzan makinen sektoreetarako irtenbideak asmatzeko.

 

Horrela, Gamarrako Atarian (Vitoria-Gasteiz) jatorria duen kooperatiba-taldeak, Tarragonan, Errioxan, Mexikon eta Indian eskumeneko enpresak dituenak, Alemanian ere izango du presentzia Deutschland GmbH RPK filialari esker. BMW konpainiarekin sinatutako hitzarmenetik jaiotako kooperatiba hori Alemaniako fabrikatzailearen enkargu berriak eskuratzeko asmoz eratu dute.

 

Iturria: RPK

Eusko Jaurlaritzak, Innobideak 2015 estrategiaren barne, programa berri bat sortu du enpresetan langileen parte-hartzea bultzatzeko. Egitasmo horrek euskal enpresen berrikuntza sustatuko du teknologia alorretik at. Modu horretan, Innobideak-Pertsonak programa lagungarria izango da enpresen jardueran langileen partaidetza suspertzeko zenbait eremutan: kudeaketa arloko erabakietan, irabazien banaketan edota enpresaren kapital ekonomikoaren parte izateko aukeran.

Egitasmoak milioi bat euroko aurrekontua du, eta gutxienez 20 lanpostu dituzten enpresei dago zuzendua. Otsailaren 2an argitaratu zuten Innobideak estrategiaren barruan aurki daitekeen programa da. Zehazki, bi laguntza mota eskaintzen diete industria, zerbitzu tekniko eta komunikazioaren eta informazioaren gizarte arloetako enpresei: bata diagnostikoa eta diseinua egin eta prozesuan zehar laguntza eskaintzera bideratua dago, eta proiektuaren kostuaren %50 finantzatzen du, 60.000 eurotan muga jarriz; bestea, berriz, prozesuan laguntza ematean datza eta, horrek ere, kostuaren %50 ordaintzen du, gehienez 30.000 eurora arte. Bi kasuetan, konpainiako bertako langileak eta kanpoko enpresa adituak kontratatzeko gastuei aurre egiteko diru-laguntza ematen dute.

Ekonomiaren Garapen eta Lehiakortasun saileko egitasmo berri hau 2013-2016 industrializazio planaren barruan dago; eta Innobideak Lehiabide edota Kudeabide bezalako berrikuntzarako planekin bat egiten du. Azken horiek 2,4 eta 1,2 milioi euro izango dituzte, hurrenez hurren, eta iaz 275 proiektu babestu zituzten.

 

Iturria: OVES-GEEB

 

Joan de otsailaren 2an, EROSKIk 22 milioi euro ordaindu zizkien menpeko finantza-ekarpenen (MFE) inbertitzaileei, 2014 urteari zegozkion interesak kitatzeko.

 

2002ko hazkundea finantzatzeko Eroskik lehen MFEen jaulkipena egin zuenetik, kooperatibak garaiz egin izan du urteroko interes ordainketa. Guztira, 314 milioi euro pagatu ditu dagoeneko. Urte hauetan guztietan zehar, MFEen ordainsaria beti izan da %3tik gorakoa, Euriborra gehi 3 puntuko diferentziala oinarri izanda 2002ko eta 2004 jaulkipenetan, eta %2,5ko diferentziala 2007 jaulkipenetan. MFEak 2002an eskuratu dituen inbertitzaile batek, hasieran jarritako diruaren %67 berreskuratu du interes gisa. Menpeko finantza-ekarpenak 2004tik dituen inbertitzaileak %55 kobratu du interes moduan, eta 2007tik dituenak, berriz, ingresatu duenaren %34 berreskuratu du.

 

“Ekarpenen titularrek urtero ikusi dute euren inbertsioa ordaindu zaiela haren balio nominalaren arabera, finantza-merkatuan kotizatzen dutena aparte utzita”, adierazi du Rosa Carabelek, EROSKIko Ekonomia eta Finantza zuzendariak. MFEen urteko ordainsaria tituluaren balio nominalarekin lotuta dago, eta horri ezin zaizkio galerak egotzi. Berme horrek beste menpeko produktu finantzarioekiko alde ikaragarria du.

 

Indarrean dagoen araudia kontuan izanda, produktu finantzario horren bidez, kooperatiba batek baliabide propioak beregana ditzake bere hazkundea finantzatzeko; beti ere, inbertitzaileari diruaren prezioaren garapenarekin (Euribor) lotuta dagoen ordainsaria eskainiz gero, baina kooperatibaren emaitza ekonomikoei baldintzatua egon gabe. Menpeko finantza-ekarpenak (MFE) produktu finantzarioa dira eta zehatz-mehatz betetzen dituzte errekerimendu legalak; eta, une oro, Balore Merkatuaren Batzorde Nazionalaren (CNMV) gainbegiratua eta onarpena izan dute. Erakunde hori espainiar balore merkatua ikertu eta ikuskatzen duen organismoa da.

 

2015. urterako, 2002 eta 2004ko jaulkipenetarako interes-tasa %3,271an finkatu dute (%0,271 + %3ko diferentziala), eta %2,771ekoa (%0,271 + %2,5ko diferentziala) 2007ko jaulkipenetarako; interes horiek datorren urteko otsailaren 1ean ordainduko dira.

 

Merkatu finantzarioak MFEaren balioa %21 handitu du 2014an

Beste titulu finantzario batzuetan bezala, merkatuak ematen die likidezia inbertitzaileei. Bitartekaritza prozesu horren buru den Kontsumobide akordio batera iritsi zen, epemuga duen titulu berri baten truke, eta horrek MFEek gorakada handia izatea eragin zuen. Momentu hartatik, MFEen balioa %21 inguru handitu da, eta, egun, euren balio nominalaren %49 kotizatzen dute. 2013 azaroan kotizazio maila minimora iritsi zirenetik, tituluek %79ko igoera izan dute.

 

 

Trukerako aukera, %2,8 eta %4 UTBen arteko errentagarritasunarekin

EROSKI eta finantza-entitateak akordio batera iritsi dira, joan de urtarrilaren 15eko berregituratze finantzariorako hitzarmenaren barne, MFEen truke boluntarioa eskaintzeko 12 urteko bono batengatik.

 

“EROSKIk hasieratik jarrera egokia erakutsi du, komertzializaziorako finantza-entitateekin batera, Kontsumobidek egindako bitartekaritza lanetan parte hartuz inbertitzaileei aukera bat eskaini ahal izateko; MFEen jaulkipena legalki argia eta akatsik gabekoa dela frogatu den arren”, adierazi du Carabelek. “Erabakitako truke aukerak egiaztatzen du, tituluaren igorle garenez, inbertitzaileekin dugun konpromisoa. Epemuga duen aukera interesgarria eskainiko diegu, gure eskura dagoena”.

 

MFEak dituztenentzat boluntarioa izango da trukea egitea, eta prozedura horren ildo nagusiak honakoak dira:

 

• Menpeko bonua ematea (egungo MFEen maila berekoa) MFEek orain duten balioaren %55agatik, 12 urteko epemugarekin, edukitzaileak 5 urte luzatzeko aukerarekin eta Euribor gehi %3ko interes berarekin. Bonuak epemuga izan arren, eta kooperatibaren fondo iraunkor bezala kalifikatzen ez bada ere, titulu berri honen interesa 2002 eta 2004 urte bitartean MFEetan abonatutakoaren parekoa izango da; eta 0,5 puntu igoko da 2007ko jaulkipenean.

 

• Eskudirutan ordaindu, trukea egiteko unean, MFEen balio nominalaren %15.

 

Bonoaren trukea eta jaulkipena egiteko, Balore Merkatuaren Batzorde Nazionalaren (CNMV) baimena eta Eroskiko Batzar Nagusiaren aurretiko onarpena beharko da. EROSKIk bono berriak igortzen dituenean, balore merkatuak dioen bezala, finantza-entitateak arduratuko dira MFEak dituztenen artean saltzeaz. Aukera horren bidez, Kontsumobidek zuzendutako bitartekaritza prozesu horretan, inbertitzaileak inbertitu duenaren %100 berreskuratuko du bono berriaren epemugara iristean, eta kobratutako interes metatu guztiak kontuan izanda.

 

10.000 euroko inbertsio batean, trukearen aukerarekin honako itzulkinak lortuko lirateke:

 

• 2002ko inbertitzaile batek 17.100 euro kobratuko lituzke, 12 urteko bonuaren epemuga iristean; hau da, hasieran egindako inbertsioa berreskuratu eta UTBen %4ko errentagarritasuna lortuko luke (Euriborraren garapenaren araberako errentagarritasuna).

 

• 2004ko inbertitzaile batek 15.800 euro kobratuko lituzke, 12 urteko bonuaren epemuga iristean; hots, hasieran egindako inbertsioa berreskuratu eta UTBen %3,6ko errentagarritasuna lortuko luke (Euriborraren garapenaren araberako errentagarritasuna).

 

• 2007ko inbertitzaile batek, aldiz, 13.800 euro kobratuko lituzke, 12 urteko bonuaren epemuga iristean. Hasieran egindako inbertsioa berreskuratu eta UTBen %2,8ko errentagarritasuna lortuko luke (Euriborraren garapenaren araberako errentagarritasuna).

 

Iturria: TU Lankide