Egilea: editorea

Michael J. Mercer eta Charles E. Snyder Euskadira etorri dira lanera. Georgia Credit Union Affiliates (GCUA) eta National Cooperative Bank (MCB) erakundeetako zuzendari eta kontseilari ordezkariak dira, AEBetako finantza kooperatiboaren alorreko bi aditu hain zuzen ere. Beraien ustez, Mondragon Korporazioa erreferentzia bat da, bereziki balore kooperatiboak edo bazkideen ongizatea errentagarritasunarekin lotzen baitu, eta hauen ustez munduan zehar hau ez da askotan geratzen.

Badakite zertaz ari diren hitz egiten dutenean, izan ere, 2013ko irailetik Laboral Kutxarekin lankidetza hitzarmena sinatua baitu NCBk. Hitzarmen honek indartu egingo du beraien arteko hartu-emana eta negozio berriak sortzeko ere balioko du.

AEBn lan egiten duten, edo lan egingo duten Mondragon Korporazioko enpresek, NCBn edota Credit Unionek dituen 3.000 establezimenduetan aliatu finantzario bat izatea da ideia. Dena egiteke dago, baina etorkizuneko aukerak itzelak direla uste dute.

Iturria: Diario Vasco

ASLEk Europar Fondo Sozialak babestutako LANZITUZ programa aktibatu du, datozen bost urteetan Euskadin 190 enpresa eta 900 lanpostu sortzeko helburuarekin.

LANZITUZ-LAN SOZIETATEAK SORTUZ Programa, langabetuak lan merkatuan sartzea sustatzen duen proiektua da, zeina ASLEk gidatzen duen Lan Sozietateen eredua oinarritzat harturik eta ekintzailetza sustatuz. Gainera, Eusko Jaurlaritzak kudeatzen duen Euskal Herrirako Europar Fondo Sozialaren Programa Operatiboaren (2014-2020) esparruaren baitan dagoen ekimena da.

LANZITUZ, Euskadiko enpleguaren sorrera sustatzeko inplikatuta dauden hainbat erakunderen arteko elkarlanaren bidez garatuko den proiektua da. Izan ere, ALSErekin batera, Gipuzkoako Bazkundeak, Iraurgi Lantzen agentziak (Urolako eskualdeko garapenerako agentzia), Gezkik (Gizarte Ekonomia eta Zuzenbide Kooperatiboaren Institutua) eta Euskadiko CCOOk ere parte hartzen baitute egitasmo honetan.

Programa aurrera eramateko 2.168.000 euroko aurrekontua dago. Zenbateko horren %50a Europar Fondo Sozialak finantzatzen du eta 2020 urtera arte luzatuko da bere garapena.

Aipaturiko bost erakundeek, LANZITUZen bitartez, milaka langabeturengan izango dute eragina; izan ere, Lan Sozietateen bitartez, langabetu horiek beraien lanbide propioa sortzen laguntzea sustatuko baitute.

Honetarako, auto-enpleguaren eremuan informazioa eta aholkularitza jarduerak, ekintzailetzan eta enpresa-kudeaketan trebakuntza, negozio ideien formulazioan laguntza, eta programa honen baitan sortzen diren enpresen lehen hilabeteetan zehar jarraipen eta zuzendaritza bultzatuko dituen programa bateratua diseinatu da.

Haratago, trebakuntza jarduerekin, hamaika langabetuk Lan Sozietateen eredua aukera moduan ezagutzeko parada izango du; eredu honekin, Gizarte Ekonomiaren baloreak, kudeaketa demokratiko eta gardena bultzatzen duen enpresa mota eta pertsonan oinarritutako egitura bultzatu nahi da. Enpresa eredu honen inguruko sentikortasunaren sustapenaz gain, enpresa txikien kudeaketa integrala aurrera eramango dutenen gaitasunak areagotzea lortu nahi du trebakuntza programa honek. Modu honetan, enpresen kudeaketa alorrean garrantzitsuenak diren ezagutzak sustatuko dira, besteak beste: langileen kudeaketa edota merkataritza  eta finantza-ekonomiaren kudeaketa.

Trebakuntza honekin, parte-hartzaileen enplegabilitatea hobetzeaz gain, hauen sen ekintzailea sustatzea ere lortu nahi da. Modu honetan, negozio ideia duten pertsonek goi mailako aholkularitza izango dute enpresa-plana prestatu eta berau martxan jarri ahal izateko

LANZITUZ proiektuaren balorerik garrantzitsuenetako bat bere izaera kolaboratiboa da; izan ere, esparru oso desberdinetako erakundeak eta lurralde desberdinak biltzen ditu Euskadirako helburu estrategiko bateratu batera hurbiltzeko asmotan, besteak beste enplegua eta enpresen sare iraunkorra sortzeko. LANZITUZekin ezagutza eta esperientzia handia jarriko da hiru lurraldeetako langabetuen eskura enplegua eta ekimenak sortzeko.

Programa osatzen duen jarduera multzoak 900 enplegu berri eta 180 lan sozietate sortzea helburu du. Honek euskal lan sozietateetan lanpostuen kopurua %16ean igotzea eta mota honetako enpresa kopurua %30ean igotzea suposatuko luke. Horretarako, LANZITUZ Euskal Gizarte Ekonomia indartzeko ekarpen garrantzitsua izan daiteke dudarik gabe.

Javier Muñecas, LANZITUZ proiektuko koordinatzailea (ASLE)

Gizarte Ekonomiako Euskal Behatokia, lantalde berria

Aire berriak datoz Gizarte Ekonomiako Euskal Behatokitik. Izan ere, hiru lagunez osaturiko lantalde berriak hartuko du Behatokiaren lekukoa. Lantalde berri hau, jadanik zehazturik dauden hiru eremuez arduratuko da, hala nola: alor juridikoaz, sozio-ekonomikoaz eta baita akademiko/zientifikoaz ere.

Lehenik eta behin, eta arlo juridikoari dagokionean, Ane Etxeb    arria Rubio izango dugu arduradun. Gizarte Ekonomiaren esparruan txosten juridikoak egiteaz gain, gai honen inguruko legedi, deialdi eta bestelako berri politikoen eguneraketa ere egingo du. Ane Zuzenbidean lizentziatua da, eta UPV/EHUko Gizarte Ekonomiako Master Ofiziala egin ondoren, ASLEn ere aritu zen denbora batez, beraz Gizarte Ekonomiako errealitatea gertutik ezagutzen du.

Bigarrenik, Gizarte Ekonomiako ikuspegi sozio-ekonomikoaren inguruan lan egingo duen pertsona, kasu honetan Irati Labaien Egiguren, Euskal Herriko Gizarte Ekonomiaren ikuspegi sozio-ekonomikoa islatzeaz arduratuko da. Besteak beste, bere zereginen artean, urteroko txostenaren elaborazioa, gai hauen inguruan web-orria gaurkotua mantentzea, Gizarte Ekonomiako erakunde desberdinen inguruan dagoen datu-basearen eguneraketa, eta datu-base honen ustiapenari bultzada berritzaile bat ematen saiatuko da. Iratik, Enpresen Administrazio eta Zuzendaritzan lizentziatu ondoren, Globalizazio eta Garapenaren inguruko Masterra ikasi zuen, eta Garapenari Buruzko Ikasketetan Doktoretza amaitu zuen 2014an. Gaur egun, Euskal Herriko Unibertsitateko (UPV/EHU) Ekonomia Aplikatua III Sailean (Ekonometria eta Estatistika) irakasle ere bada.

Azkenik, Leire Oregi Etxeberria-Berreyarza dugu, eremu akademiko/zientifikoaren erantzulea. Gizarte Ekonomiaren inguruan argitaratutako artikulu, ikerlan, eta bestelako lan akademikoen jarraipena eta sistematizazioa egiteaz arduratuko da. Leire, Enpresen Administrazio eta Zuzendaritzan lizentziatua da eta UPV/EHUko Gizarte Ekonomiako Master Ofizialeko lehen promozioko ikaslea izan zen 2014/2015 ikasturtean. Gizarte Ekonomiako esparruan murgildurik ibili da masterreko urtetik, eta besteak beste, Gezki Institutuan, Gizarte Zerbitzuen eta Gizarte Inkubagailuen gaietan ikerlari moduan lanean aritu da. Sektorea hurbiletik ezagutzeko aukera izan du beraz Leirek.

Hiru lan-eremu hauek elkarrekiko duten lotura banaezina kontuan hartuta, Anek, Iratik eta Leirek, elkarlanean oinarritutako lantaldea sortzea ezinbestekotzat jo dute. Honetaz gain, hiru lagun hauek alor desberdinetatik badatoz ere, badute batzen dituzten hamaika balore. Ekonomia zuzentzen duen korronte nagusiak bistan utzi dituen gabezien aurrean, Ekonomia Sozial eta Solidarioak eskain ditzakeen potentzialtasunak indartzea beharrezkoa dela uste dute, pertsona oinarritzat hartzen duen garapenaren bidea hartuaz.

Ane, Irati eta Leire gogotsu datoz Gizarte Ekonomiaren sozializazioa sustatzera, eta nola ez, behatokiari merezi duen bultzada ematera. Zorte on neskak!

Harremanetarako:

Ane Etxebarria (gezki.teknikaria@ehu.eus), tlf. 943017462

Irati Labaien (gezki.ekonomia.teknikaria@ehu.eus), tlf. 943017462

Leire Oregui (gezki.zientifikoa.arduradura@ehu.eus), tlf. 943017482

Iturria: GEZKI.

Unibertsitateko gizarte inkubagailuen inguruko udako ikastarorako plazak libre

Ikastaroa Donostiako Miramarreko jauregian izango da, irailaren 12 eta 13an. Lehenengo egunean goizeko 9:00tatik arratsaldeko 17:30etara izango da, eta bigarrenenan, 9:15etatik 13:45etara. Ikastaroak 20 orduko balio akademikoa izango du, eta 70 euro balio ditu, hala ere, matrikula murriztu edo bereziagatik eta salbuespen matrikulagatik deskontuak aplikatuko dira.

Matrikulatu ahala izateko sakatu hemen. 

Errigoraren kanpaina berria: “Nafar hegoaldeko uzta eskutik eskura”

Olioaren kanpainaren arrakastaren ondoren, Errigora proiektuak, Erriberako nekazal produktu desberdinen sorten kanpaina berria atera du hilabete honetarako, euskarazko etiketekin gainera. Talde honek sustatu dituen kanpaina desberdinen bidez, kontsumitzaileek bertako ekoizleei bidezko prezioetan erosketa zuzena egin diezaieten errazten da; modu honetan, Nafarroako hegoaldean euskara indartzeko ekonomikoki kolaboratuz.

Kanpaina honen helburua urte honetan, sorten bidez kontserben bilketa egin ahal izatea da, gainera aurten sorta hauetan produktu berriak eskaintzen dira. Sorta hauen salmenta, Euskal Herriko 65 herri desberdinetan egin zen maiatzaren 12tik 24ra bitartean eta baita web orriaren bitartez ere (http://www.errigora.eus/). “Nafar hegoaldeko uzta eskutik eskura”  kanpainak, merkaturatze bide laburren eredua bultzatu nahi du, honela Euskal Herrian elikadura subiranotasunaren alde jarduerak sustatuz. Kanpaina honen bigarren zatian, “pintxopote” deiturikoan parte hartzen duten taberna desberdinei produktu hauek eskaintzea da xede, hauek arrazoizko prezioetan produktuak lortuz pintxoak egin ditzaten.

Errigorako ekoizle eta kideek, Iruñeko Condestablen prentsaurrekoa eskaini zuten euskalgintzako agenteen laguntzarekin.  AEK-ko eta Ikastolen Elkarteko ordezkariak ere bertan egon ziren. Ikastolen Elkarteko presidentea den Koldo Tellituk hitza hartu zuenean, auzolanen egiten den lana azpimarratu nahi izan zuen. Besteak beste nabarmendu zuen, Nafarroa hegoaldeko euskararen egoera oraindik ere oso larria dela, ez duela babes juridikorik eta gainera, ez dagoela euskara susta dezaketen herri ekimenak ahalbidetzen dituen planifikaziorik.

Iturria: Gara

Ekainaren 23an Koldo Mitxelena liburutegian izango den “Lan autonomoa eta Politika Ekonomikoak: sektore hau baloratzeko gakoak” jardunaldian izen-emateko epea oraindik irekia.

Antolatzaileak: GEZKI (UPV/EHU), Ekaicenter eta Friedrich Ebert Stiftung Fundazioa.

Laguntzailea: Eusko Jaurlaritza.

Plaza mugatuak izango dira.

Izen-ematea doakoa izango da eta ekainaren 20 arte irekia egongo da, 943250104, ekai@ekaicenter.eu

Ordutegia: 9.00-17.15.

Informazio gehiago hemen. 

Disziplinarteko Kooperarock jardunaldia

Maiatzaren 19an EHUko Gizarte Ekonomia Masterreko hainbat ikasle eta irakaslek LANKIk antolatutako kooperatibismoaren balioen inguruko hausnarketa jardunaldian parte hartu zuten, Kooperarock programako ekintzen artean dagoena.

Jardunaldia lau ataletan banatu zen. Lehenengoan, Aitzol Loiolak Eta Maider Iriartek Arizmendiarrietaren eragina duen euskal kooperatibismoaren jatorria gogoratu eta eraldaketa soziala lortzeko hezkuntza eta lana oinarri direla azaldu zuten. Komunitatea sortzeko hezkuntza integralaren eta belaunaldiartekoaren ideiak azpimarratu zituzten. Bigarren zatian, egungo hezkuntza sistemak beharrezko dituen aldaketen inguruko taldekako hausnarketa egin zen. Bukatzeko, talde bakoitzak ideia garrantzitsuenak azaldu zituen eta jardunaldian sortu ziren gogoeta ezberdinen inguruko eztabaida eman zen parte hartzaile guztien artean. Bideoa ikusi

EHU, Deusto eta Mondragon Unibertsitateko hainbat ikasle eta irakaslek parte hartuko dute egitasmo honetan. Jardunaldi hauetako helburu nagusia, diziplinarteko testuinguru batean ideia ezberdinen trukea sortzea da, ondoren Lankik kontutan hartuko dituena Gasteizeko Teatro Paraiso antzerki taldearekin lan egiteko. Proiektu honetan ikastola eta eskola ezberdinetako haurrekin lan egingo da, eta antzerki taldeak jardunaldietan agertu diren kooperatibismoaren inguruko ideia ezberdinak bilduz antzezlan bat egingo du.

Iturria: GEZKI

Jordi Via Gizarte Ekonomiako lehen Topaketan

Jordi Viak Gizarte Ekonomiako lehen jardunaldietan parte hartu du Bartzelonako Udaleko Gizarte Ekonomiako arduradun moduan. Jardunaldi hauek maiatzaren 10ean ospatu ziren Oreretan.

Ospakizun honetan besteak beste honako lagun hauek parte hartu zuten: OlatuKoop enpresen sareko Beñat Irasutegi, Oarsoaldeako gerente den Fernando Nebreda, eta Pasaiako zinegotzia den Sergio Ekiza. Gainera, Fiare Banku Etikoa, Coop 57, eta Iruñeko Landare Kontsumo Kooperatibako ordezkariak ere han egon ziren.

Jordi Viak egin zuen aurkezpenak, hiri eredu berri baten martxan jartzearen esperientzia ezagutarazi zuen. Gizarte Ekonomiari buruz, pasa den urtarrilean argitaratu zen Txostenean agertzen ziren datu agregatuek, ekonomia ulertzeko era berritzailea den Gizarte Ekonomia, bazterreko ekonomia izatetik pixkanaka toki handiago bat hartzen ari dela bistaratu zuten.

Oreretako zinegotzia den Eñaut Graciak jardunaldiko honako ondorioan azpimarratu zituen:

-Erakunde publikoei neutraltasun jarreratik ateratzeko beharra.

-Gizarte Ekonomia balore hegemonikoak bultzatzen dituen baloreei (bereziki indibidualtasun eta lehiakortasuna) aurre egiteko tresna moduan kontuan hartzea.

-Publiko eta pribatuaren inguruko paradigma gainditu, eta publiko-kooperatibo-komunitate bezalako bestelako paradigmetan lan egin.

-Jardunaldi desberdinen antolaketan eta gaiaren ezagutzan sakontzeko, Bartzelonako udaleko adibidea bezalakoak jarri.

-Azkenik, politika ekonomikoaren erdigunean pertsonak helburu izatearen beharra.

Jordi Viasen hitzaldia entzuteko sakatu hemen.

Iturria: GEZKI

Euskadiko hirugarren sektore soziala arautzen duen legea onartu dute

Legebiltzarreko alderdi guztiek onartu dute legea, EH Bilduk izan ezik. Legeak Hirugarren Sektore Sozialeko sektore publikoarekin eta Administrazioarekin harreman eta kolaborazio bideak arautzen ditu.

Eusko Legebiltzarrak ostegun honetan onartu du lege bakarrean batzea Hirugarren Sektore Sozialean lan egiten duten irabazi-asmorik gabeko erakundeen funtzionamendua eta printzipioak. Erakunde horiek, gizarte politikak prestatzerako orduan, administrazio publikoekin bere harremana indartuta ikusten dute.

Legea Ganberako osoko bilkuran onartu dute, bozkatzeko zeuden artikulu eta zuzenketa batzuk argitu ostean. EH Bilduk izan ezik, alderdi guztiek babestu dute legea. Koalizio abertzalea abstenitu egin da, sektorearen oinarrizko aspektuetan "aukera bat galdu dela" iritzita.

Belen Arrondo EH Bilduko legebiltzarkideaak salatu duenez, legeak ez ditu errespetatzen erakunde horientzako finantzazioa eta baliabideak eta langileen lan-baldintzak. Alderdi horren ustez, erakunde hauetan euskararen erabilera bermatuko duen eskaera baten beharra dago.

Batzarraren hasieran, Angel Toña Enplegu eta Gizarte Politiketako sailburuak azaldu du legeak bi helburu dituela: Hirugarren Sektore Sozialaren garrantzia aitortzea eta kirol zein kultur jardueretatik bereiztea. Toñak adierazi du testuak erakundeen onespena duela, eta "euskal gizartean justizia eta elkartasuna sustatzeaz gainera", "ezinbestekoa" dela gizarte zerbitzuen mesederako.

Legearen edukia

Legeak Hirugarren Sektorearen parte hartze aktiboa aurreikusten du gizarte politika publikoen eta arauemaileen gauzatzean. Horretaz gain, erakunde hauek sektore publikoarekin eta administrazioarekin harreman eta kolaborazio bideak arautzen ditu, eta administrazio publikoarekin jarduten duten erakundeekin betebehar batzuk ezarriko ditu, kudeaketa "etikoa eta gardena" lortzeko asmoz.

Legebiltzarrean onartu duten testuak herritarren ekarpenak ere jaso ditu eta hainbat erakunde ere batu dira ekimenera; Irekia, Gizarte Zerbitzuetako Euskal Kontseilua, Elkarrizketa Zibilerako Mahaia, Ekonomia eta Gizarte Kontseilua, Boluntariotzaren Euskal Kontseilua, Foru Aldundiak, Eudel eta Arartekoa, besteak beste.

Legea PDF formatuan hemen. 

Iturria: www.eitb.eus

Maiatzaren 6an ospatu zen ASLEko Batzar Orokorra

Maiatzaren 6an Bilboko Euskalduna Jauregian ASLEko Batzar Orokorra ospatu zen, aitorpen berezia eginez 25 urte bazkide bezala bete dituzten euskal lan sozietateei.

Batzarrean, Enplegu eta Gizarte Politiketako Sailburua, Angel Toña, eta Iñigo Urkullu Lehendakaria izan ziren. Azken honek ekitaldian adierazi zuenez, euskal enpresak laguntzen jarraituko du hauek baitira ekonomiaren eta ongizatearen mamia.

Bestalde, ekitaldiko hitzaldiaren arduraduna Jose Carlos Díez izan zen, Alcalako Unibertsitateko irakaslea eta “Hay vida después de la crisis” liburuaren egile dena, eta egungo egoera ekonomikoak enpresa txiki eta ertainen gain dituen eraginei buruz hitz egin zuen.

Batzarraren itxieran, ASLEko presidente den Carlos Pujanak adierazi zuenez, egun 298 lan sozietate dira bazkide, 5.155 langile parte direnak. Bukatzeko, Batzordea aprobetxatu zuen lan sozietateak babesten eta laguntzen dituen politika fiskal bat eskatzeko.

Iturria: GEZKI