Bloga

Eusko Jaurlaritzako Enplegu eta Gizarte Politikako Sailak gizarte intereseko izendatu du Gureak, desgaitasunen bat duten pertsonen laneratze-gizarteratze prozesua helburu duen Sozietate Anonimo formako erakundeari aitorpena eginez.

Aitorpen honekin Gureak erakundeak Euskal Autonomia Erkidegoko gizarte zerbitzuen garapenari egiten dion ekarpena balioesten da, bere zerbitzu eskaintza eta gizarte ekintzen garapena dela eta.

Laneratze prozesuetan Europa mailan erreferente bilakatu da Gureak. Gaur egun 5.000tik gorako pertsonala du enpresak, zeintzuetatik %84ak desgaitasun motaren bat duen. Gogora dezagun erakundearen bazkide nagusiak Atzegi (Adimen urriko pertsonen aldeko Gipuzkoako elkartea), Gipuzkoako Foru Aldundia, Ilunion (ONCE), Kutxa Fundazioa eta Donostiako Udala direla.

Gureak taldearen diru sarreren %16 soilik diru publikotik dator, europako bataz bestekoarekin alderatuz (%60) askoz ere baxuagoa. Fenomeno hau bere negozioek duten lehiakortasunak eta salmenta propioen auto-finantzaketa altuak azaltzen dute.

Iturria: Estrategia empresarial

Pasa den irailaren 6, 7 eta 8an Costa Ricako Unibertsitatean Gizarte Ekonomia eta Solidarioko XI Rulescoop Kongresua egin zen, bertan Latinoamerikako eta Europako 23 unibertsitatetatik iritsitako ikertzaile eta adituak eta gobernuetako kideak parte hartu zuten.

Kongresua CICAPak (UCRko Administrazio Publikoko Ikerketa eta Trebatze Zentroa) eta Rulescoop Sareak antolatu zuten,  eta helburu nagusia arloko akademikoak, ikertzaileak,  gobernuetako eta Gizarte Ekonomiako adituak elkartzea izan zen, ikerlanetako emaitzak eta aurrerapenak ezagutu eta eztabaidatu ahal izateko.

Gai nagusia “Gizarte Ekonomiako harremanak gizarte jasangarri eta barneratzaile baterako, eta loturak bere jatorriarekin, Zuzenbidearekin eta garapenarekin” izan zen, eta honen inguruan eztabaidatu ahal izan zuten bertaratu ziren 100 parte hartzaile baino gehiagok.

GEZKI Institututik, “Gizarte Ekonomiaren inklusioa Euskal Herriko Unibertsitateko graduko ikasketetan” azterlan kuantitatiboa aurkeztu zen, Gizarte Ekonomiak EHUko ikasketetako programa akademikoetan duen presentzia ikertzen duena eta honen errealitatea islatzeaz gain etorkizunean hobetzeko erronkak aurkezten dituena.

Kongresuaren itxiera ekitaldian, CICAPeko Zuzendaria den Mayela Cubillo pozik azaldu zen lortutako emaitzekin; egun hauetan zehar, parte hartzaileek hainbat ideia eta proposamen partekatzeaz gain, Gizarte Ekonomiak mundu barneratzaileago eta demokratikoago bat lortzeko aktore garrantzitsua dela aztertu baitzuten. Zuzendariaren hitzetan “Ikerketa eta Trebatze zentroak bere eginkizuna bete du”.

Azpimarratu behar da, Costa Ricako Gobernuak Gizarte Ekonomia eta Solidarioko enpresa, entitate eta taldeen garapena, sorrera, sustapena eta formalizazioa interes publikoko gai deklaratu dituela, beraz, momentu ezin hobea Kongresua lurralde honetan egiteko.

Bestalde, ekitaldian omenaldia egin zitzaien 2005 urtean Rulescoop Sarea sortu zuten unibertsitateei, hauen artean, Euskal Herriko Unibertsitatea, Valentzikoa, Madrileko Konplutentsea, Erroma III, Bretañakoa, Costa Ricakoa, Chilekoa, Bogotako Javeriana, Unisinos eta Uruguayko Errepublikakoa.

Funtsean, Kongresua aukera bikaina izan zen nazioarteko aktore eta taldeak elkartzeko eta hauen arteko elkarlana sustatzeko, Gizarte Ekonomiako gaietan aurrera pausuak eman daitezen helburuarekin.

Azkenik, CICAP Zentroari eskertu momentu oro jasotako arreta, emandako harrera eta Kongresuaren antolaketa bikaina.

Ane Etxebarria.

Euskadiko Lan Sozietateen Elkarteak (ASLE) atzo, irailaren 28an, Bilbon Euskal Autonomia Erkidegoko Lan Sozietateen eta ASLE beraren historia jasotzen duen liburua aurkeztu zuen.

Ekitaldia, Eusko Jaurlaritzako Lan eta Justizia Sailburu María Jesús San Josék burutu zuen eta Bilboko Yimbi aretoan egin zen. Bertaratukoek liburuaren ale bana jaso zuten, zeinak elkartearen historia eta euskal Lan Sozietateen esperientziak jasotzen dituen.

Iturria: ASLE

María Jesús San José Eusko Jaurlaritzako Lan eta Justiziako sailburuak gaur iragarri du Euskadin Gizarte Ekonomia sustatzeko laguntzen bidez 200 enpresa-proiektu baino gehiago ezartzen eta 800 enplegu berri sortzen lagunduko dela. Bestalde, Laboral Kutxaren EaSI lerro berriaren bidez, zeina bolumen handienekoa den Europa mailan, mailegu eta kreditu kontuak eskuratzea erraztuko da, gizarte inpaktu positiboa duten enpresen proiektuentzat.

Lan eta Justiziako sailburuak Gizarte Ekonomiara bideratutako laguntzen deialdien balantzea egin du, eta 2017an ia 4 milioi eurokoak izango dira, alegia, aurreko urtean baino % 17 gehiago. Gainera, laguntzen zenbateko osoaren erdia Gizarte Ekonomiako enpresa berriak sortzera bideratuko dela azaldu du. “Aurreikusten da 2017 ekitaldia itxi aurretik, 230 enpresa-proiektu inguru sortzea; horrela, guztira, 850 enplegu sortuko dira”. Enpresa-ekimen berriak sortzeko bide emateaz gainera, laguntzen bidez, Gizarte Ekonomiaren sektorearen eskari nagusiei erantzungo zaie, hura eratzen duten erakundeak sendotuko dira, beren jarduera betetzeko baldintzak hobetuko dira eta, kokapena eta lurraldeko errotze sendoa galdu gabe, kanpora irteteko aukera ematen dute, merkatu berriak bilatzera,eta handiago egiteko eta lehiakorragoak izateko aukera ematen dute.

Laboral Kutxa eta Europako Inbertsio Funtsa

Bestalde, Laboral Kutxaren EaSI lerroak 30 milioi euro baino gutxiagoko fakturazioa duten gizarte ekonomiako enpresei 500.000 eurorainoko mailegu eta kreditu kontuak eskuratzea erraztuko die. Gainera, ez du mailegu bermerik eskatuko eta 50 milioi euroak 30 hilabeteko tartean ematea hitz eman du.

Gizarte inpaktu positiboa eragitea da ekimenaren helburua eta, horretarako, adierazle multzo bat ezarri da, finantziazioa eskatzen duen erakundearen araberakoak. Ekimenak lau aktibitate bereizi ditu:

Iturria: Eusko Jaurlaritza, Laboral Kutxa

Gizarte ekonomiako enpresek euren proiektu kooperatiboak martxan jartzeko behar duten finantzaketarako sarrera errazten duen lankidetza akordioa sinatu du Elkargik ELKARLAN (Kooperatibak sustatzeko elkartea), ERKIDE (Euskadiko Lan Elkarteen, Irakaskuntza, Kontsumo eta Kreditu Kooperatiben Federazioa) eta EKGKren (Euskadiko Kooperatiben Goren-Kontseilua) artean.

Akordioa kooperatiba berrien inbertsio eta likidezia operazioak ahalbidetzera bideratzen da, mailegu, kreditu, leasing eta 100.000 eurorainoko lerro komertzialak finantzatzeko asmoz, beste hainbesteren artean.

Iturria: TuLankide, ELKARGI

Euskadiko Kooperatiben Goren Kontseiluak aurten ere martxan jarri du Bitartekaritza ikastaroa, Gizagune Fundazioarekin lankidetzan.

Helburua da profesionalak teknikoki prestatzea, erakundeetan egon daitezkeen personal zein gatazka egoerak kudeatzeko, erakunde eraginkor, produktibo eta osasungarriak lortzeko.

Ikastaroa datorren urrian hasiko da, eta abenduan amaituko da. 100 ordu izango dira, horietatik 35 presentzialak  eta gainerakoak online.

Informazio gehiago hemen: info@csce-ekgk.coop

Iturria: CSCE

Pasa diren irailaren 25 eta 26an Bilboko Deustuko Unibertsitatean IECren Kongresuaren edizio berri bat ospatu zen, “Kudeaketa demokratikoa eta horren aplikazio praktikoa enpresa eragingarria” izenpean.

Kongresuaren irekiera ekitaldian hitza hartu zuten Jokin Diaz Arsuagak, Eusko Jaurlaritzako Gizarte Ekonomiako Zuzendaria, eta Javier Goienetxeak, Euskadiko Kooperatiba Kontseilu Goreneko lehendakaria.

Bi jardunaldietan Kooperatiba, Zuzenbide eta Gizarte Ekonomia arloko hizlari adituak parte hartu zuten, besteak beste, Carlos Vargas, Enrique Gadea, Aitziber Mugarra eta MCC, NER Group eta SSI taldeetako ordezkariak, beste batzuen artean.

Ponentzia guztiak mahai inguru ezberdinen inguruan antolatu ziren, moderatzaileak instituzio ezberdinetako ordezkariak izan zirelarik, hauen artean, GEZKIko zuzendaria den Aitor Bengoetxea, MUko Saioa Arando, eta Deustuko Unibertsitateko Vega Mª Arnáez, Javier Arrieta, Mariola Serrano eta Marta Enciso.

Azkenik, itxiera ekitaldian Zuzenbide Fakultateko Dekanoa den Gema Tomás Martínezek hartu zuen hitza.

Iturria: Deusto

Oraingoz ingelesez soilik argitaratu duten “Cooperatives and Employment” mundu mailako bigarren txostenean, 156 herrialdeetako datuak bildu dira eta, Nazioarteko Industria, Artisau eta Zerbitzu Kooperatiben Elkartearen (CICOPA) arabera, kooperatibek 279,4 milioi langile dituzte mundu osoan.

Lehenengo txostena 2014 urtean argitaratu zen eta Euskal Autonomia Erkidegoko hainbat agentek ere parte hartu zuten datuen bilketan besteak beste (KONFEKOOP, EKGK eta Mondragon Taldea). Txosten hau gaztelerara eta frantsesera soilik itzuli zuten.

Lehenengo txostena gazteleraz ikusteko, egin klik hemen. Frantsesez eskuratzeko, egin klik hemen.

Bigarren txostena eskuragarri, ingelesez, hemen.

Iturria: CICOPA

REAS Euskadi Garapenerako Lankidetzarako Euskal Kontseiluan parte hartzeko hautatu duten erakundeetako bat da. Aipatutako Kontseiluan, Euskadiko GGKE-en Koordinakundearen barruan ez dauden baina garapenerako lankidetzan aritzen diren gizarte-eragileen ordezkaritza osatuko du.

Garapenerako Lankidetzari buruzko otsailaren 22ko 1/2007 Legearen 16.1 artikuluan aurreikusitakoarekin bat etorriz, Garapenerako Lankidetzaren Euskal Kontseilua lankidetzarako eragileen ordezkaritza-organoa da. Garapenerako euskal lankidetza publikoaren esparruan, proposamenak, aginduak eta jarraipena egiteko gaitasuna du.

Kontseiluak ordezkaritza instituzionala dauka, ondoko erakundeen ordezkariek osatuta: Eusko Jaurlaritzako sailak, Emakunde, Eusko Legebiltzarra, foru aldundiak, EUDEL eta Euskal Fondoa, baita gizarte-eragileak ere, hala Euskadiko GGKE-en Koordinakundekoak nola Koordinakunde horren barruan ez dauden gizarteko, unibertsitateko eta bestelako esparruetakoak. Azken talde horretan parte hartzeko izendatu dute REAS Euskadi, hain zuzen.

Izaera instituzionaleko kontsulta-organo honetan parte hartzeaz gainera, Gizarteratzeko Euskal Kontseiluan eta Eusko Jaurlaritzako Elkarrizketa Zibilerako Mahaian eta Bizkaiko Foru Aldundiaren Elkarrizketa Zibilerako Mahaian ere hartzen du parte, eta harremanak eta/edo hitzarmenak ditu beste erakunde batzuekin, hala nola, Universidad del País Vasco/Euskal Herriko Unibertsitatearekin eta Ekonomia Sozialaren Euskal Behatokiaren Kontseiluarekin.

Espazio horietan parte hartzearen xedea da REAS Euskadiren interlokuzioa eta aintzatespena handitzea; estrategia hori, instituzioetan ezartzeaz gainera, gizartean ere aplikatzen du. Modu horretan, REAS Euskadik gizartearen eta herritarren beste espazio batzuetan parte hartzen du, hainbat plataformaren bitartez, adibidez: Fiare Banca Etica eta Fiare proiektua babesteko euskal elkartea, Goiener (Energia berriztagarria sortu eta kontsumitzearen aldeko kooperatiba), EGES (Ekonomia Sozialaren Euskal Sarea), Ekain (Euskadin Gizarteratzeko Sareak), Sareen Sarea (Euskadiko Hirugarren Sektoreko Sareak), Euskal Herriko Eskubide Sozialen Gutuna eta EHan TTPI/CETAri Ez kanpaina.

Era berean, proiektuak partekatu, eta bi aldeko kontaktu edo harremanak ditu beste eragile batzuekin, besteak beste, erakunde eta mugimendu sozialekin, unibertsitateekin, sindikatuekin, alderdi politikoekin eta abarrekin.

Modu horretan, REAS Euskadik Euskadiko eragile instituzional eta sozialen aurrean duen aintzatespena handitu nahi du, baita ekonomia solidarioaren proposamenak agenda sozial eta politikoetan gehitu ere. Halaber, esanguratsuak izango diren eraldaketak lortzeko beharrezko loturak estutu eta aliantzak ezarri nahi ditu, REAS Euskadiren aukeretatik eta esparrutik harago heltzeko xedez.

ITURRIA: REAS EUSKADI