Egilea: oves-geeb

Inklusio Sozialeko UNED Katedrak Gizarteratzeko Jardunbide Egokien Nazioarteko III. Kongresua egin zuen azaroaren 14an eta 15ean, Tomelloson (Ciudad Real).

Kongresuak gizarteratzeko jardunbide egokiak zabaltzen ditu, jardunbide egokien mahaien bidez. ‘Gizarteratzea, gizarte-ekonomia, erronkak eta aukerak gure garapen-eredua definitzeko une kritiko batean’ lelopean egin zen topaketa, eta UNEDeko Gizarteratze Katedrak, Tomellosoko Udalak, Ceres Fundazioak eta Gizarte Zerbitzuetako Zuzendarien eta Gerenteen Estatuko Elkarteak sustatu zuten.

200 bat lagunek parte hartu zuten Lepanto kaleko CERES Prestakuntza Zentroan egin zen eta Gizarte Ekonomiako I. Erakusketa Nazionala ere barne hartu zen kongresuaren baitan. Programan, eskualdeko ekonomia sozialaren gaur egungo egoeraren inguruko hitzaldiak eman ziren, Espainia eta Europa mailan. Portugalgo esperientziei ere arreta berezia jarri zitzaien, aurtengoan Herrialde hori bai zen “herrialde gonbidatua”.

Eztabaida batzuk ere egon ziren, hala nola enpleguak benetako inklusioa eragiteko duen gaitasuna eta Gizarte Zerbitzuen eginkizuna, gutxieneko errenten eta enpleguaren politikak integratzeko beharra eta gizarte-ekonomiak horretan izan dezakeen papera. Azkenik, nabarmendu behar da Espainia osoko hainbat erakunde eta baliabide publiko zein pribatutan oinarrituriko Gizarteratzeko Jardunbide Egokien 20 kasu aurkeztu zirela.

Iturria: UNED eta Tomelloso

Zuzenbide Kooperatiboaren eta Gizarte Ekonomiaren Institutuaren 40. urteurrena ospatu zuten atzo Donostian, GEZKIren egoitzan, Carlos Santamaria zentroan.

Institututik gure eskerrik beroenak adierazi nahi dizkiegu ekitaldira joan ziren pertsona eta erakundeetako ordezkari guztiei, baita lau hamarkada hauetan zehar erakunde hau babestu eta lagundu dutenei ere. Aukera berezia izan zen Institutuaren ibilbideaz hausnartzeko eta bide horretan gure ondoan egon diren eragileekin batera mugarri hori partekatzeko.

Irekiera-ekitaldian parte hartu zuten Elena Pérez Barredo Lan eta Gizarte Segurantzako sailburuordeak, Eusko Jaurlaritzaren izenean; Montse Maritxalar Graduondoko eta Etengabeko Prestakuntzako errektoreordeak, UPV/EHUren izenean; eta Aitziber Etxezarreta Etxarri GEZKI Institutuko zuzendariak, azken erakunde horren izenean.

Sylvia Gay, GEZKI Institutuaren sortzaileetako bat eta egungo kolaboratzailea, izan zen Institutuaren hastapenak gogora ekartzeko arduraduna. Ekitaldian zehar, omenaldi hunkigarria egin zitzaion, egindako lana eskertzeko, eta ohorezko txapela bat eman zitzaion GEZKIren izenean, esker onaren sinbolo gisa. Hitzaldian, Sylviak eskerrona adierazi zuen bide hori partekatzeagatik, eta gutun bat irakurri zuen Koldo Gorostiagaren izenean, hura ere Institutuaren sortzaileetako bat izan baitzen.

Ondoren, “Bira Produkzioak”-ek ekoiztutako bideo bat proiektatu zen, Institutuaren mugarri esanguratsuenak errepasatu eta bere historia irudien bidez islatu zuena.

Goizean zehar, Institutuaren gaurkotasunari buruz hitz egin zuten EHUko irakasle eta Institutuko kide diren Aitor Bengoetxea, Aitziber Etxezarreta eta Mikel Zurbanok.

Jarraian, CIRIEC-Españako Jose Luis Monzónek Gizarte Ekonomiako institutu batek gaur egungo testuinguruan dituen erronka nagusiak azaldu zituen.

GEZKI Institutuko kolaboratzaileen lana ardatz duen mahai-inguruak Euskadiko Gizarte Ekonomiako pertsona erreferenteak bildu zituen. Parte-hartzaileen artean, Jokin Diaz, Eusko Jaurlaritzako Gizarte Ekonomiako zuzendaria; Marta Enciso, Deustuko Unibertsitateko Ikasketa Kooperatiboa institutuko kidea; Ainara Udanondo, Mondragon Unibertsitateko LANKI institutuko kidea; Patxi Olabarria, Kooperatiben Kontseilukoa; Jone Nolte, ASLEkoa; Pablo Moratalla, EHLABEkoa; Joana Revilla, GIZATEAkoa; Rosa Lavín, KONFEKOOPekoa; Silvia Piris, REAS-Euskadikoa eta Gorka Julio, Olatukoop sarekoa.

Ekitaldiari amaiera emateko, Aitziber Etxezarreta GEZKIko zuzendariak, Julen Izagirre idazkari akademikoak eman zioten, Oskar Estangaren ikuskizun musikalarekin batera, ekitaldiaren gakoak umorez azaltzeko.

Eskerrik asko guztioi!

Iturria: OVES/GEEB

Kolonbiako Unibertsitate Kooperatiboko (UCC) Cali Campusa nazioarteko topaketa akademiko garrantzitsu baten eszenatokia izan da. Bertan Gizarte eta Kooperatiba Ekonomiako Unibertsitate Sareko (RULESCOOP) hainbat unibertsitatetako ordezkariak bildu gara urriaren 21etik 25era. Hain zuzen ere, Kolonbia, Txile, Ekuador, Puerto Rico, Argentina, Uruguai, Mexiko, Italia, Frantzia, Portugal, Valentzia, Almeria, Madrid eta Euskal Herriko Gezki eta Lanki-ko ikertzaileak bildu gara. Aipatzekoa da, aurtengo edizioan Mondragon Unibertsitateko Lanki-ko kideak onartuak izan direla partaide bezala Rulescoop sare horretan.

Rulescoop-eko Biltzarrak garrantzi globaleko bi ekitaldirekin bat egin du, Nazioarteko ECOOVIDA 2024 Topaketarekin eta Munduko Gobernuen Biodibertsitatearen aldeko COP16 Biltzarrarekin, ekonomia sozial eta solidarioari buruzko ezagutzak eta esperientziak trukatzeko gune ezin hobea eskainiz.

Hain zuzen ere, Rulescoop sareak parte hartu du ECOOVIDA 2024 Topaketan eta bere ikertzaileek ponentzia desberdinak aurkeztu dituzte antolatu diren 10 foro desberdinetan. Gezkiren ordezkari bezala, ponentzia bat aurkeztu dute (“La Gobernanza SocialTransformadora en el Departamento de Medio Ambiente del Municipio de Errenteria”) Bioekonomia eta Ekonomia zirkularraren 4º Foroan.

Horrekin batera, ECOOVIDA 2024 Topaketa horretan, unibertsitateko ikertzaileekin batera mundu guztiko eragile sozial eta ekonomiko desberdinek parte hartu dute, besteak beste, Via Campesina, Ripess, OIT, Foro Social Mundial de las Economías Transformadoras (FSMET), Movimiento Agroecológico de América Latina y Caribe (MAELA), Global Forum for Social and Solidarity Economy (GSEF) eta Confederación Latinoamericana de Cooperativas y Mutuales de Trabajadores (COLACOT). Gainera, Topaketa hau gai izanda Dokumentu bat adosteko.

Baita ere, urriaren 22an UCC unibertsitateko 150 zuzenbideko ikasle eta irakasleen aurrean hitzaldi-solasaldi bat eduki dugu (“4 reflexiones para fortalecer la Economía Social y los objetivos del Foro Ecoovida 2024”) Gemma Fajardo eta Deolinda Meida irakasleekin batera.

Horrekin batera, urriaren 22an Rulescoop-eko XVII. Asanblada ospatu dute Kolonbiako Unibertsitate Kooperatiboko Cali-ko egoitzan. UCCk anfitrioi lana egin du. Asanblada honen akta ofiziala jasotzeko zain, azpimarratu dezakete bertan Rulescoopeko hurrengo bi edizioak non ospatuko diren onartu direla. Hain zuzen ere, 2025ekoa Pisan (Italian) ospatuko da urriaren 23tik 25era eta 2026koa Puerto Ricon, oraindik datak zehaztu gabe (ikusi 5-1 eta 5-2. eranskinak). Dena dela, Rulescoopen jardunaldi hau aukera paregabea izan da nazioarteko harremanak sendotzeko, ekonomia sozial eta solidarioan lan egiten duten ikertzaileak ezagutzeko eta beste eragile sozial eta ekonomiko alternatiboekin harremanak bideratzeko.

Fuente: Eusebio Lasa Altuna GEZKIko Kidea

GIZATEAK, Euskadiko Gizarteratze Enpresen Elkarteak, “Euskal Autonomia Erkidegoan Laneratzeko Enpresentzako Kontratazio Erreserbatua: Euskal Autonomia Erkidegoan Laneratzeko Legea betetzeko Gakoak” jardunaldira gonbidatzen zaitu. SPKL Legearen 4. Edizioa” azaroaren 21ean ospatuko da Bilboko Euskalduna Jauregian. Topaketa honen helburua da kontratazio erreserbatua indartzea gizarteratzeko eta laneratzeko tresna gisa, oztopoak identifikatzea eta esperientzia arrakastatsuak eta jardunbide egokiak partekatzea.

Horretarako, adituen, erakundeen eta gizarteratze-enpresen parte-hartzea izango da, kontratazio erreserbatua eta jarraipen-metodoak praktikan jarri baitituzte, kontratazio erreserbatua errealitate eraginkor bihurtzeko.

Topaketan zehar, Sektore Publikoko Kontratuei buruzko Legearen 4. xedapen gehigarrian jasotako Kontratu Erreserba betetzea erraztuko duten gakoak, tresnak eta baliabideak ezagutzen saiatuko dira.

Jardunaldiaren egitaraua:

•Esperientzia arrakastatsuak eta jardunbide egokiak aurkeztea, laneratze-enpresetan kalitatezko enplegu inklusiboa sortu dutenak kontratu erreserbatuen bidez.

•Kontratazio erreserbatua aplikatzea erraztuko duten gakoak, tresnak eta baliabideak identifikatzea eta legea betetzeko plangintza, kontu-ematea eta jarraipen-organoak bezalako neurriak balioan jartzea.

Informazio gehiago eta izen-ematea hemen

Jornada: Contratación reservada a Empresas de Inserción: Claves para el cumplimiento de la Disposición Adicional 4ª de la LCSP

Iturria: Gizatea

2024ko azaroaren 28an egingo da EHUko Gizarte Zientzien Fakultatean. Leioa “Lana eta Sindikalismoa XXI. mendean” Nazioarteko Kongresua

Kongresuan parte hartzeko izen-ematea zabalik dago. Gainera, Kongresuan parte hartzea doakoa da, aldez aurretik izena emanez.

Komunikaziorik aurkezten ez duten eta Kongresuan parte hartu nahi duten pertsonek izena eman dezakete biltzarraren batzorde antolatzaileari mezu bat bidaliz: congresosindicalismo@gmail.com

Biltzar hau Manu Robles Arangiz Fundazioak, Moncho Reboiras Fundazioak, Ipar Hegoa Fundazioak, Grup d ‘estudisek, Salvador Seguí Fundazioak, UPV-EHUko Lan Harremanen eta Gizarte Lanaren Fakultateak eta GEZKI Institutuak elkarrekin egindako ekimen baten emaitza da. Elkarlanerako ahalegin horrek lanaren eta sindikalismoaren eremuko erronka garaikideak ulertzeko eta jorratzeko ahaleginak batzearen garrantzia nabarmentzen du.

Antolatzaileen hitzetan,”modu kapitalistan antolatutako lana tentsio eta kontraesan ugarik zeharkatzen dute, eta langileek erantzun sortzaileak bilatu behar ohi dituzte, bai indibidualak, bai kolektiboak. Gero eta zatituago eta atomizatuagoak diren merkatu globaletan ere ekintza sindikalak antolaketa kolektiboa posible dela erakusten du. Oso praktika erabilia da, eta inplikatutako langileak behar ditu, antolamendu-, teknika- eta diskurtso-tresna ugari artikulatu behar baitira arazo politiko, ekonomiko eta sozialei posizio onuragarriago batetik heltzeko.

Hori hala izanda, kezkagarria da sindikalismoak jasotzen duen arreta urria, bai eztabaida publiko eta politikoetan, bai argitaletxe eta esparru akademikoetan ere. Askotan, anekdota gisa agertzen da, adibidez, greba edo mobilizazio batek eguneroko jarduera eteten duenean, edo patronalarekin bake soziala elkarrekin kudeatzeko akordio makroak sinatzen direnean. Berdin dio sindikatuek lan-dinamiketan duten presentzia handiak edo biltzen eta ordezkatzen duten pertsona kopuru altuak”.

Lanaren eta sindikalismoaren munduan interesa duten ikertzaile eta aktibistak kongresuan parte hartzera gonbidatzen dute.

Iturria: Congreso Sindicalismo

Azaroaren 29an eta 30ean egingo dute ekitaldia, Donostian eta zabalik dago REAS Sareen Sareko Etxebizitza Taldeak antolatzen duen Senior Etxebizitza Kooperatiboaren Foroan izena emateko epea. Foro horretan, arlo horretako profesional eta proiektu berritzaile ugari egongo dira.

Bi egun horietan zehar, hitzaldiak, mahai inguruak, tailerrak eta eztabaidak izango dira, aurrez aurre zein streaming bidez (ostiraleko saiorako).

Izen-ematea, doakoa da eta https://tinyurl.com/ForoViviendaCoopSENIOR esteka bisitatuz egin daiteke.

Foro honen leloa hauxe da: “Komunitateko zaintzak, zahartze osasuntsu baterako gakoak”. Ekitaldia etxebizitza kolaboratibo, cohousing edo koetxebizitza proiektuen estatu mailako garapenean zentratuko da eta UPV/EHUko Ikasgelategiko Auditorioan izango da.

REAS Sareen Sareko Etxebizitza Kooperatiboko Taldeko Senior Sekzioak estatuko topagune bat proposatzen du, etxebizitza-eredu gisa dituen ikuspegi eta aukera berriak jorratzeko, zahartze osasuntsua eta komunitatean bizi ahal izateko, eta, aldi berean, beste gizarte-eredu batzuk eraikitzeko.

Etxebizitzatik eraikitzen da bizitza pertsonala, familiakoa eta komunitarioa, eta garapen osoa ahalbidetzen duen funtsezko sarea osatzen du. Baina etxebizitza egokia lortzea, adinekoen bizi-beharrei erantzungo diena, gero eta zailagoa da gizartea gero eta zatituago dagoelako, bai eta mendekotasunerako zainketen eta laguntzen merkantilizazio dramatikoagatik ere.

Etxebizitza kooperatiboaren proiektuek, bizitza osorako zaintza-komunitateak diren aldetik, benetako alternatiba bat osatzen dute, bai nahi ez den bakardadeari dagokionez, bai egungo instituzionalizazioari dagokionez, zeina erabat bat baitator Estatuko Gobernuak berak planteatutako politikekin ((Plan Desinstitucionalización Mº Servicios Sociales).

Erabilera-lagapeneko etxebizitza kooperatiboaren ereduak gero eta interes sozial, instituzional eta akademiko handiagoa pizten du, zahartze-prozesuetan eta mendekotasunaren arretan nagusi diren egoitza-ereduei buruzko ikuspegi kritikoarekin batera.

Izan ere, irabazi-asmorik gabeko erabilera-lagapeneko etxebizitza kooperatiboa aldaketa-palanka bat da garapen komunitario eta jasangarrirantz elkarrekin joateko. Bide horretan, diziplina anitzeko ekarpenak ezinbestekoak dira. Foro hau topaketa askoren hasiera izatea espero da, beharrezkoa den lankidetza publiko-kooperatiboa sendotzeko.

Ekitaldia REAS etxebizitza kooperatiboa + Senior Taldeak antolatu du, GEZKI, ELKARBIDEA, REAS EUSKADI, KOOBIZITZA, AMETSAK SORTZEN eta JUBILARES erakunde eta elkarteen laguntzarekin.

Iturria: Economíasolidaria.org

Centre Delàs d’Estudis per la Pau zentroak ondorengo 66. txostena aurkeztu du: «Banka Armatua eta Gazako genozidioan duen erantzunkidetasuna. Palestinarren aurkako sarraskietan erabilitako armak egiten dituzten enpresen finantzaketa». Lana Gemma Amorosek, Eduardo Aragonek, Jordi Calvok, Max Carbonellek eta Lucia Ibañezek egin dute.

Israelek Gazan duen okupaziotik irabaziak ateratzen ari diren bankuen eta arma enpresen negozioan jartzen du fokua txostenak. Horretarako, azken urteotan estatu ezberdinek Israelera egindako arma-esportazioen, horiek ekoizten dituzten arma-enpresen eta horiek finantzatzen dituzten bankuen artean dauden loturak ezarri eta dokumentatzen dira.

Horrela, ‘Banka Armatuaz’ eta genozidioaz hitz egiten da, Israelgo armadak Gazan eta Palestinako gainerako lurraldeetan erabiltzen dituen armak saltzen dituzten enpresei finantza-erakundeen baliabide ekonomikoak ematearen erantzukizunari erantzunez. Arma horiekin, Israel gizateriaren aurkako krimenak egiten ari da modu sistematikoan, hainbat adituren ustez genozidio krimena izatera iritsi da, hori dela eta Nazioarteko Zigor Auzitegia ikertzen ari da.

Zehazki, Espainiako 12 finantza-erakunde identifikatu dira, besteak beste, Santander, BBVA, CaixaBank, Ibercaja, Banco Caminos eta Banca March, eta Israeli armak eta munizioak ematen dizkieten 15 enpresetatik zazpi finantzatu dituzte: Boeing, Day & Zimmerman, General Dynamics, Oslemetalhkosh Corp. Finantza erakunde horietatik, Santander eta BBVA dira Israelgo armadak Gazan genozidioa egiteko erabiltzen dituen armen fabrikatzaileak finantzatu dituzten banku nagusiak: 2.442 eta 1.500 milioi dolar baino gehiago, hurrenez hurren.

Errealitate horren aurrean, ondoriozta daiteke finantza etikoak genozidioan erantzukizunak dituen ‘Banka Armatu’ baten alternatiba erreal bakarra direla; izan ere, armak ekoizten dituzten enpresetan edozein inbertsio egitea baztertzen dute, eta gizateriarentzako etorkizun bat eraikitzean oinarritutako finantza-eredu bat sustatzen dute, zeinak desberdintasuna eta justizia soziala murriztearen, berdintasun eraginkorraren eta kolektibo ahulen diskriminaziorik ezaren alde egiten duen, eta, noski, giza eskubideen errespetuaren printzipioetan oinarritutzen den.

Azken hori ezinbestekoa da gatazka armatu eta genozidiorik gabeko etorkizun hobe bat eraikitzeko, txostena idatzi den egunean Gazan gertatzen ari denaren modukoa.

Iturria: Economíasolidaria.org

GIZATEA – Gizarteratzeko eta Laneratzeko Euskadiko Enpresen Elkarteak 2023an Gizatean integratutako 42 laneratze-enpresen datu ekonomiko eta sozial agregatuak aurkeztu ditu. Laneratzeko enpresak “funtsezkoak dira pertsona askori lana lortzea eragozten dion aldea murrizteko borrokan”, adierazi du Rosa Gil presidenteak.

Mikel Torres lehendakariorde eta Ekonomia, Lan eta Enplegu sailburuak, Gizateako arduradunekin batera, urteko memoriaren aurkezpen-ekitaldian, Sailak “laneratzeko enpresekin duen konpromiso sendoa” nabarmendu du. “Gizateak gaur aurkeztu duen balantzeak erakusten du zailtasunak gainditzeko gai izan garela, eta etorkizunari aurre egiteko konfiantzazko motorra da” gaineratu du lehendakariordeak.

Gizarte Txostena 2023

GIZATEA – Gizarteratzeko eta Laneratzeko Euskadiko enpresen elkarteak 42 enpresa biltzen ditu, jarduera ekonomikoen bidez lan merkatuan sartzeko zailtasun bereziak dituzten eta gizarte bazterkeriako egoeran edo arriskuan dauden pertsona langabeak gizarteratzea eta laneratzea helburu dutenak.

2023ko datu positiboek erakusten dute sektorea hazten ari dela eta laneratzeko enpresak laneratzeko tresna eraginkor gisa berresten dituzte lan merkatutik urrun dauden pertsonak gizarteratzeko eta laneratzeko:

• Sektoreak 2023an sortutako enplegua % 24 gehitu da aurreko urtearen aldean. Laneratzeko enpresek 1.852 pertsona enplegatzen dituzte, % 55 emakumeak eta % 45 gizonak.
• Horien % 57, 1.084, laneratze-prozesuan dauden langileak dira, eta % 21eko igoera erregistratu dute 2022arekin alderatuta. Hala, “2023an, egoera ahulean dauden pertsonentzat sortutako lanpostu-kopuruaren goranzko joera berretsi da” azpimarratu du Joana Revilla Gizateako koordinatzaileak.
• 2023an, laneratze tasa % 57,1ekoa izan da, laneratze-enpresako ibilbidea amaitu ondoren lan-merkatuan sartu direnen indizea islatzen duen adierazlea. Horrela, laneratze-enpresen eraginkortasuna frogatu da, baztertuta dauden edo baztertuta geratzeko arriskuan dauden pertsonak gizarteratzeko eta laneratzeko tresna gisa.
• Adierazle ekonomikoek ere joera positiboa erakusten dute. Guztizko diru-sarrerak 55 milioi eurotik gorakoak dira; horietatik salmentak % 73,1 dira eta laneratzeko enpresen diru-sarreren iturri nagusia izaten jarraitzen dute. Horrela, sektoreko ondasun eta zerbitzuen fakturazioa 40 milioi eurotik gorakoa da. Salmenta guztietatik, % 88 bezero pribatuetatik dator eta % 12 sektore publikotik, eta horrek hazkunde-aukera bat dakar laneratzeko enpresentzat gordetako kontratazioaren bidez (Sektore Publikoko Kontratuei buruzko 9/2017 Legearen 4. xedapen gehigarria).
• Laneratzeko beste programa batzuetan eta bazterkeriaren aurka borrokatzeko beste mekanismo batzuetan ez bezala, laneratze-enpresek gizartera itzulkin bat eragiten dute, bai zerga-mailan, bai maila ekonomikoan (prestazioak jasotzen dituzten pertsona langabeen kopurua murriztuz) eta kohesio eta justizia sozialari dagokionez. Horrela, 2023an, laneratze-postu bakoitzeko itzulkin ekonomikoa 9.111 eurokoa izan zen, eta horrek, oro har, 6 milioi eurotik gorako guztizko itzulera dakar. Laneratzeko plaza baten benetako kostua 7.402 €-koa da, eta horrek administrazio publikoarentzat 5.994 €-ko aurrezpena suposatzen du (diru-sarreren gutxieneko errentak jasotzen dituen pertsona baten kostuei dagokienez).
• Euskal laneratze-enpresen datuek agerian uzten dute pobreziari aurre egiteko eta gehien behar duten pertsonentzako enplegu-politika aktiboko tresna eraginkorra direla. Gizateako presidenteak adierazi duenez, “lana ez da eskubide bat bakarrik, sozializaziorako, independentziarako eta garapen pertsonalerako espazio bat ere bada, eta tamalez, pertsona guztiek ezin dute eremu horretara iritsi”.

Ikatzbizi, gizarteratze enpresa

Prentsaurrekoaren ondoren, Jesús Gazapo Ikatzbizi laneratze enpresako zuzendariak adinekoen arreta eta zaintza proiektua aurkeztu du. Ikatzbizi laneratze-enpresa, Beti Gizartean Fundazioak sustatua, 2002an sortu zen, eta gaur egun 25 pertsona enplegatzen ditu; horietatik 19 laneratze-prozesuan daude, adinekoentzako arreta-baliabideen bitartez: etxebizitza komunitario bat, eguneko zentro bat eta Etxezarra tutoretzapeko apartamentuak. “Pertsonak, hein handi batean, besteengandik jasotzen ditugun aukeren fruitu eta ondorio gara”, adierazi du Jesusek.

Aurkezpenaren ondoren, bertaratutakoek adinekoentzako arreta-baliabide baten instalazioak bisitatzeko aukera izan dute, Gasteizko Adriano VI .a kaleko 6. zenbakiko beheko solairuan dagoen eguneko zentroa, hain zuzen ere. Bertan, 25 adineko pertsona artatzen dituzte, pertsonarengan oinarritutako arreta eredu batetik.

Iturria: GIZATEA

Pasa den irailaren 30ean, Ekonomia Sozial eta Solidarioko Masterraren irekiera ekitaldian, MALAGES sariak eman ziren: lehen saria Libe Bastidarentzat eta bigarren saria Mariana Garciarentzat.

MALAGES sariak (Master Lanen GEZKI Sariak) UPV/EHUko Gipuzkoako Campusean Ekonomia Sozial eta Solidarioarekin eta Zuzenbide Kooperatiboarekin lotutako Master Amaierako Lanaren garapena sustatu eta bultzatzeko helburuarekin sortu dira.

GEZKIk, UPV/EHUko Zuzenbide Kooperatiboaren eta Gizarte Ekonomiaren Institutuak, Eusko Jaurlaritzako Gizarte Ekonomiako Zuzendaritzaren finantzaketarekin, UPV/EHUko Gipuzkoako Campuseko Masterreko ikasle egresatuei zuzendutako sari hauek bultzatzen ditu, norgehiagokaren eta gardentasunaren printzipioaren arabera.

Lehen saria “ESS gazteen lanaren iturri gisa. Libe Bastidak egindako “Lan munduan dauden ikasleen ikuspegiaren azterketa bat Gipuzkoan”.

Ikerketa-lan horren helburua izan zen aztertzea gazteek zer behar dituzten beren etorkizuneko lanari dagokionez, hori baita balioesten eta kontuan hartzen dutena, eta ikustea, bestalde, Ekonomia Sozial eta Solidarioko enpresek erantzuten ahal dieten identifikatzen diren alderdi horiei.

Lanaren kontzeptua eta lanaren zentzua oso zabalak direnez, Gipuzkoako Foru Aldundiaren Think Tank-ean garatutako “Lanaren Zentzua” txostena landu zen. Hortik, pertsona baten lanaren zentzuan eragin dezaketen 5 palanka/alderdi atera ziren: oinarrizko baldintzak, autonomia, harremanak, gaitasunen garapena eta helburu bat izatea.

Erreferentziazko 5 palanka horiek edukita, eta beste bi gehituta, hau da, bazkidea izatea eta ekintzailetza kolektiboa, IMHko (lanbide heziketako zentroa) erdi-mailako eta goi-mailako ikasleekin dinamika batzuk egin ziren, ASLEren (Euskadiko Lan Sozietateen Elkartea) eskutik, GFAko Ekonomia Sustapeneko eta Proiektu Estrategikoetako Departamentuak finantzatu eta sustatutako proiektu batean. Dinamika horietan 55 lagunek parte hartu zuten guztira.

Gainera, gizarte-ekonomiako enpresetako, lan-sozietate bateko eta kooperatiba bateko bi langile eta bazkide elkarrizketatu ziren, ulertzeko nola hautematen dituzten haiek beren eguneroko lanean identifikatutako 5 palankak. Horrek aukera ematen zuen, nolabait, praktikan ulertzeko enpresa horiek duten funtzionamendua eta pertsona horiek enpresako bazkide eta langile gisa duten pertzepzioa.

Bigarren saria Mariana Garciak idatzitako “Emakumeen ahalduntzea Ekonomia Solidarioaren eremuan: REAS Euskadiren kasua” lanari eman zitzaion.

Iturria: OVES/GEEB

Euskalgintzaren Kontseiluak Zaintza eta euskara. Sareak eraikitzen jardunaldiak egin ditu irailaren 26an, Donostian. Idurre Eskisabelek, Kontseiluaren idazkari nagusiak, lehen hitzaldian adierazi du “urgentziazkoa” dela gaiari heltzea. Jardunaldien helburua ez da izan irtenbideak aurkitzea, Eskisabelen ustez, “urrun gaude” horretatik eta asmoa “elkarrizketa probokatzea” izan da.

Goiz osoko egitaraua eskaini du Kontseiluak. Zaintza sektorean lanean ari direnak, euskaltegietako arduradunak eta esperientzia praktikoak azaldu dituzten eragileak bildu dira Donostiako jardunaldietan.

Idurre Eskisabel Kontseiluko idazkari nagusiak egin die sarrera jardunaldiei izenburu honen pean: Zer da eremu sozioekonomikoa euskalgintzarentzat? Nor utzi du kanpoan? Zergatik da zaintza estrategikoa euskararentzat?

Eskisabelek aitortu du ez zaiela erraza egin egitaraua osatzea, hau da, bataren eta bestearengana jo eta gaiaren konplexutasunaz hitz egin dietela eta zalantza egin dutela zenbaterainoko ekarpena egin dezaketen gai honetan. Eskisabelek adierazi du, “ez nuke esango jendea beldurtuta dagoenik, baina korapilo handi bat daukagu”.

Beraz, korapilo konplexua dela azpimarratu du, eta era berean, “oso modu errazean formulatu daitekeena”: zaintza ona eta justua izatea norberaren hizkuntzan artatua izanda, askoren kasuan euskaraz. Gehitu du zaindua izateko premia zaurgarritasun egoera batetik datorrela. Bestalde, euskarara iristeko zailtasunik handienak zaintza lanetan ari direnek dituztela dio, eta bere ustez, irisbide nekez hori lan baldintzengatik eta lan mota horren ezaugarriengatik da, hain zuzen.

Urgentziaz heldu beharrekoa

Gaia, heltzeko konplexua da eta era berean heldu beharrekoa, “urgentziaz heldu beharrekoa”. Jardunaldien helburua irtenbide zehatzak aurkitzea ez dela adierazi du Eskisabelek, “uste dugu oso urrun gaudela horretatik”. Asmoa “elkarrizketa probokatzea” da, euskalgintzak elkarrizketa bidea irekitzea hemendik aurrera.

Euskalduntzean fabrikak lehen lerroan

Eskisabelek denboran atzera egin du eta bistaratu nahi izan du nola eremu sozioekonomikoaren euskalduntze prozesuan hainbat alorri eman zaion lehentasuna, eta beste batzuk bigarren tokian utzi diren. Euskalgintzak, duela bi hamarkada hasita, eremu sozioekonomikoa euskalduntze bidean egindako ahalegina aitortu du, baina gaineratu du euskalgintzak eremu horretan pentsatu duenean fabrikak izan dituela buruan: “Kanpoan utzi du beti enplegu feminizatua eta prekarizatua dagoen eremua, eta ez da kasualitatea.

Gizartearen ispilu da euskalgintza ere, eta gizartea zeharkatzen duen arrakala, lan erreproduktibo eta produktiboaren artekoa, ere erreproduzitu du”. Azaldu du gizartearen zahartze prozesua areagotzen ari bada ere, zaintza ez dagoela agenda soziopolitikoan lehen lerroan, “euskalgintza ez dagoen bezala! Bat egiten dugu horretan!”.

Jarraipenik ez

Eskisabelek azken boladan daukan kezka bat elkarbanatu du entzuleekin, hau da, euskalgintzak eraldaketa sozialaren begirada eta feminismoaren ekarpenak lantzerakoan ez ote dituen garai onenak eman, ez ote duen euskalgintzak ahaztu etengabe entzutea eskatzen duela: “Bide hori egintzat emana dugula uste dut”.

Iturria: ARGIA